Arthur Cormack from Nuair Bha Mi Òg lyrics from https://cdn.shopify.com/s/files/1/0247/5213/files/Songwords_Arthur_Cormack_Nuair_Bha_Mi_Og.pdf O! fàilt' air do stùcan, Do choireachan ùdlaidh, Do bheanntanan sùghmhor, Far an siùbhlach am meann! Tha 'n geamhradh le dhùdhlachd Mu na meallaibh a' dùnadh, 'S gach doire le bhùirean Air a rùsgadh gu bonn. Is chì mi an Cuillion Mar leòmhann gun tioma, Le fhiasaig de 'n t-sneachd' Air a phasgadh ma cheann; 'S a ghruaidhean a' srùladh Le easanan smùideach, Tha tuiteam nan lùban Gu ùrlar nan gleann. Do chreagan gu h-uaibhreach, Mar challaid mun cuairt dhut, 'S na neòil air an iomairt, A' filleadh mum bàrr; 'S am bonn air a sguabadh Le srùlaichean gruamach, Bho bhàrcadh a' chuain A' toirt nuallain air tràigh. Ol c' àit 'eil na gaisgich A dh'àraich do ghlacan, Bu shuilbhire macnus Mu stacan a'cheò? Le fùdar ga sgailceadh Bho 'n cuilbheirean glana, 'S na mial-choin nan deannaibh, Nach fannaich san tòir. Na laoich nach robh meata Ri aodann a' bhatail, Nach aomadh gu taise Ri caismeachd an nàmh, Cha 'n eil raon agus machair Air 'n do sgaoil iad am bratach, Nach d' fhàg iad an eachdraidh Gun mhasladh d'an àl. Ach tha 'm fàrdaichean sguabte, 'S an seòmraichean uaine; Iad fhèin is an gaisge Nan cadal fon fhòid; 'S tha osag nam fuar-bheann, Le h-osnaidhean gruamach, Gan caoidh mu na cruachan, 'S a' luaidh air an glòir. Ach 's caomh leam do ghleanntan, Do shrathan 's do bheanntan, 'S an ceò tha na chadal Air baideal nan àrd; Na ciabhagan torach, Na srònagan corrach, 'S na sruthain ri coireal Do 'n eilid 's da h-àl. Gu ma buan a bhios t' eachdraidh, Agus cliù aig do mhacaibh, Gus an crìonar an talamh, 'S am paisgear na neòil! Fhad 's bhios sìaban na mara A' bualadh air carraig, Bidh mo dhùrachd gun deireas Do dh'Eilean a' Cheò.
|