Recording

Song: The Hills o' Gallowa'
Artist: Jo Miller
Album: A' the way to Galloway (2023)

The Hills o Gallowa


Amang yon birks sae blythe an gay
I met my Julia homeward gaun
The linties chantit owre the spray
The lambies loupit on the lawn
On ilka holm the swaird wis mawn
The braes wi gowans buskit braw
An gloamin’s plaid o grey wis thrawn
Oot owre the hills o Gallowa

Wi music wild the wuidlands rang
An fragrance wing’t alang the lea
As doon we sat the flooers amang
Beside the banks o stately Dee
My Julia’s arms encircled me
An saftly slade the oors awa
Till dawnin coost a glimmerin ee
Oot owre the hills o Gallowa

It isna owen, sheep or kye
It isna gowd, it isna gear
This lifted ee wad hae, quo I
The world’s drumlie gloom tae cheer
But gie tae me my Julia dear
Ye powers wha rowe this yirthen ba
And o sae blythe thro life I’ll steer
Amang the hills o Gallowa

When gloamin dauners up the hill
An oor guidman ca’s hame the yowes
Wi her I’ll trace the mossy rill
That o’er the muir meand’rin rowes
Or tint amang the scroggie knowes
My birken pipe I’ll sweetly blaw
An sing the streams, the straths an howes
The hills an dales o Gallowa

An when auld Scotia’s heathy hills
Her rural nymphs an jovial swains
Her flowery wiles an wimplin rills
Awake nae mair my cantie strains
Where freenship dwells and freedom reigns
Where heather blooms an maircocks craw
Gae dig my grave an lay my banes
Amang the hills of Gallowa